«HUMANITY STAR», a primeira obra de arte no espazo

O seu despregamento suscitou unha agre polémica entre astrónomos de todo o mundo, xa que o seu intenso brillo dificultará as observacións científicas.

Arte ou simple lixo espacial? Esa é a cuestión. O domingo 21 de xaneiro Nova Zelandia lanzou con éxito o seu primeiro foguete, con tres satélites comerciais a bordo, o que a converteu na undécima nación da Terra capaz de levar unha carga útil ao espazo.

 

Con todo, o foguete, construído pola empresa Rocket Lab, levaba a bordo un pasaxeiro "extra", que tamén se despregou en órbita (e en segredo) ao mesmo tempo que os satélites. Tratábase de Humanity Star, unha esfera geodésica de algo máis dun metro de diámetro, feita de fibra de carbono e formada por 65 paneis altamente reflectores. O seu propósito? Ser visible desde a Terra e converterse, durante os nove meses que permanecerá aí arriba, na primeira obra de arte espacial da historia, ademais do obxecto máis brillante do ceo nocturno. A súa existencia foi revelada por Rocket Lab cando a estrela artificial estaba xa no ceo.

Parecida a un gran balón de praia, ou a unha desas esferas reflectoras que iluminan as discotecas, Humanity Star foi concibida por Peter Beck (o CEO de Rocket Lab), quen asegura que a "obra de arte" poderá ser contemplada por todo o mundo en todo o planeta, a medida que vaia pasando por encima das nosas cabezas.